رام پور: جیل میں قید سماج وادی پارٹی کے جنرل سکریٹری اور سابق وزیر اعظم خان، ان کے بیٹے عبداللہ اعظم اور اہلیہ تزئین فاطمہ سے متعلق کیس میں ہفتہ کو فیصلہ آ سکتا ہے۔ ان لیڈروں کو پہلے ہی عبداللہ اعظم کے برتھ سرٹیفکیٹ کے دو مقدمات میں سزا سنائی جا چکی ہے۔ اب رام پور کی خصوصی ایم پی-ایم ایل اے عدالت اپنا فیصلہ سنائے گی۔
رام پور کی خصوصی عدالت عبداللہ اعظم خان کے برتھ سرٹیفکیٹ کیس میں سزا کے خلاف اپیل پر اپنا فیصلہ دے سکتی ہے۔ اس کے علاوہ پڑوسیوں کی طرف سے مار پیٹ کے معاملے میں بھی عدالت اپنا فیصلہ سنائے گی۔ ایس پی لیڈر اعظم خان اور عبداللہ اعظم اس معاملے میں ملزم ہیں۔ دونوں کو ہفتے کے روز عدالت میں پیش کیا جائے گا، تاکہ عدالت حملہ کیس میں اپنا فیصلہ سنا سکے۔
رپورٹ کے مطابق اعظم خان اور عبداللہ اعظم کی رام پور عدالت میں پیشی کے حوالے سے عدالت کے باہر سخت حفاظتی انتظامات کیے گئے ہیں۔ دراصل 18 اکتوبر کو عدالت نے اعظم خان، ان کی اہلیہ تزئین فاطمہ اور بیٹے عبداللہ اعظم کو 7-7 سال قید کی سزا سنائی تھی۔ تب سے یہ تینوں رہنما مختلف جیلوں میں سزا کاٹ رہے ہیں۔ تزئین فاطمہ رام پور جیل میں قید ہیں، جبکہ اعظم خان کو سیتا پور جیل اور عبداللہ اعظم کو ہردوئی جیل میں قید کیا گیا ہے۔
اگر رام پور کی ایم پی-ایم ایم اے عدالت برتھ سرٹیفکیٹ کیس میں ہفتہ کو اعظم خان اور ان کے خاندان کو کوئی راحت نہیں دیتی تو خاندان الہ آباد ہائی کورٹ سے رجوع کر سکتا ہے۔ دونوں مقدمات میں عدالت کا فیصلہ دوپہر دو بجے کے قریب آنے کی توقع ہے۔