بنگلہ دیش کی وزیر اعظم اور عوامی لیگ کی سربراہ شیخ حسینہ نے اتوار کو ہونے والے عام انتخابات میں ووٹوں کے بھاری فرق سے اپنی نشست جیت لی۔ انہوں نے ایک بار پھر گوپال گنج-3 پارلیمانی سیٹ پر شاندار جیت درج کی ہے۔ اس کے ساتھ ہی ان کی عوامی لیگ پارٹی نے پارلیمانی انتخابات میں 300 میں سے 200 نشستیں جیت لی ہیں جبکہ باقی نشستوں کے نتائج ابھی آنے باقی ہیں۔
حسینہ (76) کو گوپال گنج-3 سیٹ سے 249,965 ووٹ ملے جبکہ اس سیٹ پر ان کے قریبی حریف بنگلہ دیش سپریم پارٹی کے ایم نظام الدین لشکر کو صرف 469 ووٹ ملے۔ گوپال گنج کے ڈپٹی کمشنر اور ریٹرننگ آفیسر قاضی محبوب عالم نے انتخابی نتائج کا اعلان کیا۔ شیخ حسینہ 1986 کے بعد آٹھویں بار گوپال گنج-3 سیٹ سے جیتی ہیں۔
شیخ حسینہ کی جماعت عوامی لیگ نے 300 پارلیمانی نشستوں میں سے 200 پر کامیابی حاصل کی ہے جب کہ باقی نشستوں کے لیے گنتی ابھی جاری ہے۔ بنگلہ دیش میں حکومت سازی کا جادوئی نمبر 151 ہے۔ ایسے میں شیخ حسینہ کا پانچویں بار اقتدار میں واپسی یقینی ہے۔
بنگلہ دیش کے الیکشن کمیشن کے ترجمان نے کہا کہ ہم عوامی لیگ کو فاتح کہہ سکتے ہیں کیونکہ اب تک کے نتائج میں ان کی جماعت نے کامیابی حاصل کی ہے تاہم حتمی نتائج کا اعلان باقی نشستوں پر ووٹوں کی گنتی مکمل ہونے کے بعد ہی کیا جائے گا۔