ممبئی: کانگریس پارلیمانی انتخابات کے پیش نظر پوری طرح سرگرم دکھائی دے رہی ہے۔ سبھی ریاستوں میں انتخابات کی تیاریاں زور و شور سے جاری ہیں اور انہی تیاروں کے پیشِ نظر مہاراشٹر پردیش کانگریس کمیٹی نے 18 سے 29 جنوری کے درمیان ریاست کے تمام ڈویژنوں کے اپنے سبھی شعبہ جات کی جائزہ میٹنگ منعقد کرنے کا اعلان کیا ہے۔
ریاستی کانگریس پارٹی کے نئے انچارج رمیش چینیتھلا کی موجودگی میں اور ریاستی کانگریس صدر نانا پٹولے کی صدارت میں ہونے والی ان میٹنگوں میں ریاستی اسمبلی کے پارٹی لیڈر بالاصاحب تھوراٹ، سابق وزیراعلیٰ و کانگریس ورکنگ کمیٹی رکن اشوک چوہان، حزبِ مخالف لیڈر وجے
وڈیتیوار، سابق وزیر اعلیٰ سشیل کمار شندے، پرتھوی راج چوہان، قانون ساز کونسل کے گروپ لیڈر ستیج بنٹی پاٹل، ریاستی کارگزار صدر و کانگریس ورکنگ کمیٹی کے رکن چندرکانت ہنڈورے، رکن اسمبلی یشومتی ٹھاکور، رکن اسمبلی پرینتی شندے، ریاستی کارگزار صدر نسیم خان، بسوراج پاٹل، رکن اسمبلی کنال پاٹل، ریاست کے سابق وزراء، ضلعی صدور و اہم عہدیداران شامل ہوں گے۔ یہ میٹنگیں صبح 10 بجے سے دوپہر 1 بجے کے درمیان اور دوپہر 2.30 بجے سے 5.30 بجے کے درمیان ہوں گی۔
مہاراشٹر کانگریس کے ذریعہ دی گئی جانکاری کے مطابق امراوتی ڈویژن کی جائزہ میٹنگ 18 جنوری کو امراوتی میں، ناگپورڈویژن کی 20 جنوری کو گڈچرولی میں، مغربی
مہاراشٹر کی 23 جنوری کو پونے میں، کوکن ڈویژن کی 24 جنوری کو بھیونڈی میں، شمالی مہاراشٹر کی 27 جنوری کو دھولیہ میں اور مراٹھواڑہ کی 29 جنوری کو لاتور میں منعقد ہوگی۔