نئی دہلی: شراب پالیسی سے متعلق منی لانڈرنگ کے معاملے میں ای ڈی کے ذریعہ اروند کیجریوال کو جاری کئے گئے سمن پر حاضر نہ ہونے کے معاملہ میں دہلی کی راؤز ایونیو کورٹ شام 4 بجے فیصلہ سنائے گا۔ انفورسمنٹ ڈائریکٹوریٹ نے کیجریوال کے خلاف سی آر پی سی کی دفعہ 190 (1) (اے) اور پی ایم ایل اے کی دفعہ 63 (4) کے تحت نئی شکایت درج کی ہے، جس پر دہلی کی عدالت جس پر عدالت نے فیصلہ محفوظ رکھا ہے۔
رپورٹ کے مطابق اس معاملہ میں ایڈیشنل میٹرو پولیٹن مجسٹریٹ دویا ملہوترا شام 4 بجے فیصلہ سنائیں گی۔ سماعت کے دوران ای ڈی کی طرف سے پیش ہوئے اے ایس جی ایس وی راجو نے عدالت سے کہا کہ کیجریوال سمن کو مسلسل نظر انداز کر رہے ہیں۔ ای ڈی نے گزشتہ چار مہینوں میں کیجریوال کو پانچ سمن جاری کیے ہیں، جن کو وزیر اعلیٰ نے غیر قانونی قرار دیا اور ای ڈی کے سامنے پیش ہونے سے انکار کر دیا۔
اے ایس جی ایس وی راجو نے کہا کہ منی لانڈرنگ ایکٹ کی دفعہ 50 کے تحت ای ڈی نے اروند کیجریوال کو پانچ بار سمن بھیجا، لیکن پانچوں بار سی ایم کیجریوال نے سمن کو نظر انداز کیا اور ای ڈی کے سامنے پیش نہیں ہوئے۔ ای ڈی کے دلائل سننے کے بعد کورٹ نے فیصلہ محفوظ رکھا ہے۔