چنڈی گڑھ : بالی ووڈ اداکارہ اور بی جے پی ایم پی کنگنا رناوت کو چنڈی گڑھ ہوائی اڈے پر تھپڑ مارنے والی سی آئی ایس ایف کی خاتون سیکورٹی اہلکار کلویندر کو ابھی بحال نہیں کیا گیا ہے۔ حالانکہ خاتون سیکورٹی اہلکار کو چنڈی گڑھ ایئرپورٹ سے بنگلورو منتقل کر دیا گیا ہے۔ ذرائع نے یہ اطلاع دی ہے۔ فی الحال کلویندر کور معطلی پر ہیں اور ان کے خلاف تحقیقات جاری ہیں۔
ذرائع نے بتایا کہ کنگنا رناوت کو تھپڑ مارنے کے واقعہ کے بعد سی آئی ایس ایف کی خاتون سیکورٹی اہلکار کلویندر کور کا تبادلہ بنگلورو کر دیا گیا تھا۔ ذرائع کی مانیں تو اس پورے معاملے کی جانچ کے لیے ایس آئی ٹی تشکیل دی گئی تھی جس نے اپنی تحقیقاتی رپورٹ اعلیٰ حکام کو سونپ دی ہے۔ حالانکہ کوئی بھی عہدیدار اس معاملے میں کچھ کہنے کیلئے تیار نہیں ہے۔ ذرائع نے انکشاف کیا ہے کہ کلویندر کور کو معاملہ کے بعد معطل کر دیا گیا تھا، لیکن اب تک انہیں بحال نہیں کیا گیا ہے۔
کیا ہے پورا معاملہ؟
یہ واقعہ 7 جون 2024 کو پیش آیا تھا ۔ ہماچل پردیش کے منڈی ضلع سے رکن پارلیمنٹ کنگنا رناوت دہلی جارہی تھیں۔ اس دوران چنڈی گڑھ ہوائی اڈے پر ایک خاتون سیکورٹی اہلکار کلویندر کور نے انہیں تھپڑ مار دیا تھا۔ کنگنا رناوت کے کسان آندولن سے متعلق بیان سے کلویندر کور کافی ناراض تھیں، جس کی وجہ سے کنگنا کے ساتھ بدتمیزی کی گئی تھی۔ اس واقعہ کے کچھ ویڈیوز بھی سامنے آئے تھے ۔ لیکن تھپڑ مارنے کا کوئی ویڈیو سامنے نہیں آیا تھا ۔
اس پورے معاملے نے کافی سرخیاں بٹوری تھیں۔ اس معاملے کے بعد سی آئی ایس ایف کے اعلیٰ افسران بھی موقع پر پہنچ گئے تھے اور جانچ کی تھی۔ خاتون اہلکار کو بعد میں ڈیوٹی سے ہٹا دیا گیا تھا۔ ملزم خاتون سیکورٹی اہلکار پنجاب کے کپورتھلا کی رہنے والی ہیں اور ان کے شوہر بھی سی آئی ایس ایف میں کام کرتے ہیں ۔ پنجاب کے کسانوں نے اس پورے معاملے میں کلویندر کور کی حمایت کی تھی۔