سری نگر : جموں و کشمیر میں انتخابی سرگرمیاں زوروں پر ہیں۔ اسی سلسلے میں سری نگر میں پہلی انتخابی ریلی سے خطاب کرتے ہوئے وزیر اعظم نریندر مودی نے اسمبلی انتخابات کے حوالے سے عوام کے جوش و خروش کی تعریف کی۔ ساتھ ہی انہوں نے نیشنل کانفرنس، کانگریس اور پی ڈی پی پر جم کر نشانہ سادھا ۔ سری نگر کی ریلی میں پہنچے لوگوں سے خطاب کرتے ہوئے وزیراعظم مودی نے کہا کہ آج آپ اتنی بڑی تعداد میں آئے ہیں۔ نوجوانوں کا یہ جوش، بڑوں کی آنکھوں میں امن کا پیغام اور اتنی بڑی تعداد میں مائیں اور بہنیں … یہ ہے نیا کشمیر۔
وزیراعظم مودی نے یہ بھی کہا کہ ہم سب کا مقصد جموں و کشمیر کی تیز رفتار ترقی ہے۔ انہوں نے کہا کہ آج میں آپ کے درمیان جموں و کشمیر کی تیز ترقی کا جذبہ مزید بلند کرنے کا پیغام لے کر آیا ہوں۔ میں دیکھ رہا ہوں کہ آج کشمیر کے میرے بھائی اور بہنیں مجھے خوش آمدید وزیراعظم کہہ رہے ہیں۔ میں تہہ دل سے اس کا شکریہ ادا کرتا ہوں۔
وزیر اعظم مودی نے کہا کہ جموں و کشمیر میں اس وقت جمہوریت کا تہوار چل رہا ہے۔ کل ہی 7 اضلاع میں پہلے مرحلے کی ووٹنگ ہوئی۔ پہلی بار یہ ووٹنگ دہشت گردی کے سائے کے بغیر ہوئی۔ یہ ہم سب کے لیے بڑی خوشی اور فخر کی بات ہے کہ اتنی بڑی تعداد میں لوگ ووٹ ڈالنے کے لیے گھروں سے نکلے۔ کشتواڑ میں 80 فیصد سے زیادہ ووٹنگ ہوئی، ڈوڈہ میں 71 فیصد سے زیادہ، رامبن میں 70فیصد سے زیادہ اور کولگام میں 62 فیصد سے زیادہ ووٹنگ ہوئی۔ کئی سیٹوں پر پچھلی بار کی ووٹنگ کے ریکارڈ ٹوٹ چکے ہیں۔ یہ نئی تاریخ رقم ہوئی ہے، یہ نئی تاریخ جموں و کشمیر کے لوگوں نے رقم کی ہے۔
وہیں نیشنل کانفرنس، کانگریس اور پی ڈی پی پر حملہ کرتے ہوئے وزیراعظم مودی نے انہیں جموں و کشمیر کی تباہی کا ذمہ دار ٹھہرایا۔ وزیراعظم مودی نے کہا کہ جب میں کچھ دن پہلے جموں و کشمیر آیا تھا… میں نے کہا تھا کہ تین خاندان جموں و کشمیر کی تباہی کے ذمہ دار ہیں۔ اس کے بعد سے دہلی سے سری نگر تک یہ لوگ خوف و ہراس میں ہیں۔ انہیں لگتا ہے کہ کوئی ان سے سوال کیسے کر سکتا ہے، انہیں لگتا ہے کہ کسی طرح کرسی پر قبضہ کرنا اور پھر آپ سب کو لوٹ لینا ان کا پیدائشی حق ہے۔