حیدرآباد/نئی دہلی: تروپتی مندر کے لڈو کا معاملہ اب سیاسی شکل اختیار کر چکا ہے۔ جب سے یہ انکشاف ہوا ہے کہ تروپتی مندر کے لڈو یعنی پرسادم بنانے میں گھی کے بجائے جانوروں کی چربی کا استعمال کیا جا رہا ہے تب سے ملک میں ہنگامہ برپا ہے۔ دریں اثنا ترومالا تروپتی مندر کے سابق چیف پجاری رمن دیکشاتھلو نے ایک بڑا انکشاف کیا ہے۔ انہوں نے کہا ہے کہ ‘مجھے یہ بات کئی سال پہلے معلوم تھی۔’ انہوں نے مزید کہا کہ انہوں نے لوگوں کی آستھان اور پاکیزگی کے خلاف بڑا گناہ کیا ہے۔
بتا دیں کہ آندھرا پردیش کے وزیر اعلی چندرا بابو نائیڈو نے تروپتی لڈو پرساد کو بنانے کیلئے گھی کی بجائے جانوروں کی چربی کا استعمال کر کے اس کے تقدس کو خراب کرنے کا الزام لگایا تھا۔ لیکن وائی ایس آر کانگریس پارٹی نے اس الزام کی تردید کی ہے۔ ایسے ماحول میں جب یہ معاملہ طول پکڑ چکا ہے، نیشنل ڈیری ڈیولپمنٹ بورڈ نے تروپتی لڈو کی جانچ کی اور رپورٹ سامنے آئی۔
سابق پجاری نے کیا کہا؟
اس معاملے میں ترومالا تروپتی مندر کے سابق چیف پجاری نے کہا کہ میں نے کئی سال پہلے تروپتی لڈو پرساد کو تیار کرنے کے لیے استعمال ہونے والے گائے کے گھی میں ملاوٹ دیکھی تھی۔ متعلقہ حکام اور دیوستھانم کے سربراہ کو اس سلسلے میں شکایت کرنے کے بعد بھی انہوں نے اس پر توجہ نہیں دی۔
انہوں نے مزید کہا کہ نئی حکومت نے ان تمام الجھنوں کو دور کرنے کا وعدہ کیا ہے۔ وہ سرکاری ڈیریوں سے گھی خریدتے تھے اور اسی گھی سے تیار کرتے تھے۔ پچھلے 5 سالوں سے تروپتی لڈو میں جانوروں کی چربی اور مچھلی کے تیل کو ملانے کا سنگین گناہ کر رہے ہیں ۔ ہمیں اس بات کو یقینی بنانا چاہئے کہ مندر میں اس طرح کے سنگین گناہوں کا اعادہ نہ ہو، جہاں کروڑوں عقیدت مندوں کا گہری آستھا اور بھکتی ہے۔